長野滑雪之旅~~第三天 (下)

由輕井澤到野澤溫泉，要坐JR新幹線到長野站，再要坐長野[飯山線]去到[戸狩野沢温泉]，今次又要出動我地既4日day pass

[飯山線]列車係一列得兩卡既小型電車，類似香港既輕鐵，大約一小時至兩小時一班，我地既車係4:20左右開出，我地4:00到月台車已經可以上車。

由長野到戸狩野沢温泉要經過12個站，一個小時車程左右。

車一路行一路慢慢天黑，亦開始落雪，係呢次旅程第一場雪，大家都好開心。
我地個個人著到成隻糉咁，但當地人出出入入都係著兩件線衫~~~利害!!

車內環境


到 [戸狩野沢温泉]站(大約下午5:30)，可以坐接駁巴士去民宿，不過我地人新路不熟，天又黑晒又落緊雪。所以6個人分開左坐兩部的士去民宿，原來都幾遠路下，要3300yen(hk$250)。
的士順利到達民宿門口，外表同網上見到既一樣咁靚咁有和風，女將已經係門口度迎接我地(日本民宿或者旅館既女將即係女主人，主要係佢接待客人)，到達左民宿呢度，我已經鬆左一口氣，因為全個行程最難搵既地方都已經搵到。

到達時差不多6:00，同網上訂房時間一樣，民宿已經係呢個時候要開飯了。
睇下團友d房先，雖然唔似酒店，不過可以更加體驗到當地既氣氛，好正!!!


放低行李，視察左陣環境就去飯堂開餐。

放係我地面前有成十樣菜，仲有白飯任食。

開飯啦~~~~~~~(個個人都好肚餓)

到野沢必食既野沢泡菜，餐餐都見到，食左好開胃。

開飯情況


個個都食得好飽，好在食完唔駛洗碗(-_-:)

飯後我地休閒左一陣，跟住就出左去浸溫泉，野沢温泉區內有十三個免費溫泉任浸，每個都有唔同既成份，每間温泉小屋前都分了男/女湯,一入去有少少地方放衣物，之後各自脫光就落水浸, d水通常好熱，要慢慢適應。


浸溫泉暖粒粒既我地行左一陣商店行就打道回府休息，準備連續兩日既滑雪之旅。


日本先有既芝士味合味道，食飽大家都去訓，準備明天既滑雪之旅。

係日本入民宿同去人屋企一樣，一定要除鞋，我成日都唔記得左(T_T)
第三日~~~~~完